Ən çox verilən suallar

• Qiymətli kağızlar bazarında qiymətlərlə manipulyasiya nədir?
  
  Qiymətli kağızlar bazarında qiymətlərlə manipulyasiya qiymətli kağızlar bazarının stabilliyinin pozulmasına səbəb ola bilən, qiymətli kağızlar bazarının iştirakçılarının qiymətli kağızlarla əqdlər üzrə qiymətli kağızların bazar qiymətinin hər hansı bir üsulla əvvəlcədən razılaşdırılmış, qəsdən edilmiş əməllər ilə süni olaraq dəyişdirilməsidir. (Əsas: Qiymətli kağızlar bazarında qiymətlərlə manipulyasiyaların qarşısının alınması Qaydaları.) 
  
   
• Mərkəzi Bankın qısamüddətli notları nədir?
  
  Mərkəzi Bankın qısamüddətli notları Mərkəzi Bank tərəfindən bir ilədək müddətinə buraxılan adlı sənədsiz dövlət güzəştli qiymətli kağızlardır. Qısamüddətli notlar dövriyyədə olan pul kütləsinin tənzimlənməsi üçün nəzərdə tutulmuş pul-kredit siyasəti vasitəsidir.(Əsas: “Azərbaycan Respublikasının Mərkəzi Bankının qısamüddətli notlarının buraxılışı, yerləşdirilməsi və tədavülü haqqında” Qaydalar.)
  
   
• QKDK-da sənədlərin icra müddəti
  
  

  QKDK-da sənədlərin ümumi icra müddəti 15 gün, əlavə öyrənilməsi və yoxlanılması tələb edilən müraciətlərə baxılması isə 30 gün müəyyən edilir. Konkret hallarda hər hansı ayrıca sənədin icrası ilə əlaqədar rəhbərlik və ya yuxarı təşkilat tərəfindən xüsusi icra müddəti müəyyən edilə bilər.

• QKDK-da sənədlərin icrasına nəzarət necə həyata keçirilir?
  
  

  QKDK-da sənədlərin icrasına nəzarət edilməsi bilavasitə QKDK sədrinin nəzarəti altındadır və Ümumi şöbə tərəfindən həyata keçirilir. Nəzarətdə olan sənədlərin icra vəziyyəti haqqında QKDK-nın Aparatının rəhbərinə ayda bir dəfə olmaqla növbəti ayın 5-dək, QKDK-nın sədrinə rübdə bir dəfə olmaqla növbəti ayın 10-dək hesabat təqdim edilir.

• Qiymətli kağızlar bazarında xüsusi razılıq (lisenziya) və ixtisas şəhadətnamələri tələb edən peşəkar fəaliyyət növləri hansılardır?
  
  

  • broker fəaliyyəti;
  • diler fəaliyəti;
  • qiymətli kağızların idarə  olunması üzrə fəaliyyət;
  • klirinq fəaliyyəti;
  • depozitar fəaliyyəti;
  • qiymətli kağız sahiblərinin reyestrinin aparılması üzrə fəaliyyət;
  • fond birjası.
• Hal-hazırda Azərbaycanda hansı növ qiymətli kağızlar dövriyyədədir?
  
  

  Hal-hazırda Azərbaycanda veksellər, çeklər, istiqrazlar, səhmlər, depozit sertifikatı, ipoteka kağızı, opsion, fyuçers,  mənzil sertifikatı, Mərkəzi Bankın notları və özəlləşdirmə çekləri kimi qiymətli kağızlar dövriyyədədir. 

  • İstiqrazlar və səhmlər investisiya qiymətli kağızlarıdır.
  • Çeklər və veksellər ödəniş (orderli) qiymətli kağızlarıdır.
  • Opsion və  fyuçerslər törəmə qiymətli kağızlardır.

   

• Qiymətli kağızlar nə deməkdir? Hansı kağız və ya sənədlərə qiymətli kağızlar demək olar?
  
  

  Qiymətli kağız – forması və rekvizitləri qanunvericiliklə müəyyənləşən və hər hansı hüququ təsdiq və təsbit edən sənəddir. Qiymətli kağızlar sənədli və ya sənədsiz formada, adlı və ya adsız (təqdim edənə) ola bilər. Sənədli formada olan qiymətli kağızlar xüsusi qoruyucu nişanlara malik olmalıdır. Qiymətli kağızlar əsasən borc (istiqrazlar), sahiblik (səhmlər) və törəmə (opsionlar, fyuçerslər) qiymətli kağızlarına bölünür. 

   

• İpoteka kağızının və istiqrazlarının buraxılışı kim tərəfindən həyata keçirilir?
  
  

  İpoteka kağızının emitenti – ipoteka predmetinin mülkiyyətçisi olan ipoteka qoyandır.

  İpoteka istiqrazının emitenti - ipoteka kreditlərinin verilməsi üçün vəsaitlərin və ya əlavə vəsaitlərin cəlb edilməsi məqsədi ilə istiqrazları buraxan xüsusi fondlar və ya kredit təşkilatlarıdır.

   

• QKDK-da vətəndaşların qəbulu işi necə təşkil olunub?
  
  

  QKDK-da vətəndaşların qəbulu hər ilin əvvəlində QKDK sədri tərəfindən təsdiqlənmiş qəbul günləri cədvəlinə müvafiq olaraq həyata keçirilir. QKDK sədrinin, Aparat rəhbərinin və yaxud struktur bölmə rəhbərlərinin qəbuluna düşmək arzusunda olan hər bir vətəndaş ərizə yazmaqla müraciət etmək hüququna malikdir. 

   

• İpoteka istiqrazlarının ipoteka kağızlarından fərqi nədir?
  
  

  İpoteka istiqrazı – ipoteka kreditlərinin verilməsi üçün hüquqi və fiziki şəxslərin sərbəst pul vəsaitlərinin cəlb edilməsi məqsədi ilə emissiya edilən təminatlı istiqrazlardır. İpoteka istiqrazı  ipoteka kreditlərinin verilməsi üçün pul vəsaitlərin cəlb edilməsi məqsədi ilə buraxılır.

  İpoteka kağızı – qanunvericiliklə müəyyənləşdirilmiş rekvizitlərə və formaya malik, öhdəliyin icrasının təmin edilməsi üçün daşınmaz əşyaların və mülkiyyət hüquqları rəsmi reyestrdə qeydə alınan daşınan əmlakların girovunu təsbit və təsdiq edən adlı qiymətli kağızdır. Borclu, öhdəliyi icra edə bilmədikdə və ya vaxtında icra edə bilmədikdə, İpoteka kağızının sahibi olan ipotekasaxlayan (həm də  kreditor) borcun icrası (ödənilməsi) üzrə tələbi bu qiymətli kağız vasitəsilə təsbit olunan ipoteka predmetinə yönəldə bilər.  

   

• QKDK-da hansı sənədlər nəzarətə götürülür?
  
  

  Sənədlərin icrasında aşağıdakı sənədlər xüsusi nəzarətə götürülür:

  • bilavasitə qanunvericilik aktlarının icrası ilə əlaqədar sənədlər;
  • dövlət hakimiyyəti orqanlarının və ya yuxarı təşkilatların icra müddəti göstərilən tapşırıqlarını nəzərdə tutan sənədlər;
  • QKDK-nın rəhbərliyi tərəfindən icra müddəti göstərilən sənədlər.

  QKDK-nın sədrinin, onun müavinlərinin və ya Aparatın rəhbərinin göstərişi ilə icrasının nəticəsinin məruzə edilməsi nəzərdə tutulan digər sənədlər də nəzarətə götürülə bilər.

   

• QKDK-ya daxil olan sənədlərin qeydiyyatı və rəhbərliyə təqdim olunması hansı müddətdə həyata keçirilir?
  
  

  Sənədlər bir qayda olaraq, QKDK-ya daxil olduğu gün qeydiyyata alınır və müvafiq qaydada rəhbərliyə təqdim olunur. 

   

• QKDK-da kargüzarlıq necə həyata keçirilir?
  
  

  QKDK-da kargüzarlığın aparılması Azərbaycan Respublikası Prezidentinin 2003-cü il 27 sentyabr tarixli 935 nömrəli Fərmanı ilə təsdiq edilmiş “Dövlət hakimiyyəti orqanlarında, idarə, təşkilat və müəssisələrində kargüzarlığın aparılmasına dair Təlimat”a, həmçinin “Azərbaycan Respublikasının Qiymətli Kağızlar üzrə Dövlət Komitəsi haqqında Əsasnamə”yə əsasən hazırlanmış “QKDK-da karğüzarlığın aparılması Qaydaları”na müvafiq olaraq həyata keçirilir. Bu Qaydalar QKDK-nın mərkəzi aparatından əlavə, eləcə də, onun strukturuna daxil olan digər qurumlarda, habelə tabeliyində olan qurumlarda kargüzarlığın aparılmasının vahid sisteminin fəaliyyətini tənzimləyir.

   

   

• Kütləvi təklif üsulu ilə yerləşdirilmiş Dövlət istiqrazlarının tədavülü harada keçirilir?
  
  

  Kütləvi təklif üsulu ilə yerləşdirilmiş Dövlət istiqrazlarının tədavülü BFB-də həyata keçirilir. (Əsas: “Dövlət istiqrazlarının emissiyası, tədavülü və ödənilməsi haqqında” Əsasnamə.)

   

• Dövlət istiqrazlarının emitenti kimdir?
  
  

  Dövlət istiqrazların emitenti qismində Azərbaycan Respublikasının Maliyyə Nazirliyi çıxış edir. (Əsas: “Dövlət istiqrazlarının emissiyası, tədavülü və ödənilməsi haqqında” Əsasnamə.)

   

• İstiqrazlar nədir?
  
  

  İstiqraz, onun sahibinin onu buraxmış şəxsdən istiqrazda nəzərdə tutulan müddətdə istiqrazın nominal dəyərini və ya başqa əmlak ekvivalentini almaq hüququnu təsdiqləyən qiymətli kağızdır. (Əsas: Mülki Məcəllənin 1070.1. bəndi.) 

   

• Mərkəzi bankın qısamüddətli notlarının tədavülü harada keçirilir?
  
  

  Mərkəzi bankın qısamüddətli notlarının təkrar bazarda tədavülü Fond Birjası vasitəsilə və ya bilavasitə banklar arasında bağlanılmış əqdlər əsasında həyata keçirilir. (Əsas: “Azərbaycan Respublikasının Mərkəzi Bankının qısamüddətli notlarının buraxılışı, yerləşdirilməsi və tədavülü haqqında” Qaydalar.)

   

• İnsayderlərə kimlər aiddir?
  
  

  • emitentin direktorlar (müşahidə) şurasının (bu orqanlar olduqda) və  icra orqanlarının üzvləri;
  • emitentin fəaliyyətinə nəzarət edən şəxslər;
  • xidməti məlumatı tutduğu vəzifəyə, müqaviləyə, yaxud emitent və ya digər insayder tərəfindən müvafiq hüququn verilməsi nəticəsində əldə etmək imkanı olan şəxslər;
  • emitentin nizamnamə kapitalının on faizindən artıq hissəsinə  malik olan şəxslər.

  (Əsas:  Mülki Məcəllənin   1078-47.1-ci bəndi.) 

   

• Qiymətli kağızlar bazarında xidməti məlumat nədir?
  
  

  Xidməti məlumat ümumi qaydada əldə edilə bilməyən, qiymətli kağızlar bazarının iştirakçısı olan təşkilatlarda, yaxud müvafiq dövlət orqanlarında tutduğu vəzifə ilə əlaqədar olaraq əldə edilən və ya emitentlə bağlanmış müqaviləyə əsasən, qiymətli kağızlar bazarının subyektləri, qiymətli kağızlar, onlarla əməliyyatlar, qiymətlər və digər xüsusatlar üzrə açıqlanmamalı olan və istifadə edildikdə məlumat sahibinə qiymətli kağızlarla əməliyyatların aparılmasında digər iştirakçılardan daha üstün mövqe təmin edən məlumatdır. (Əsas: Mülki Məcəllənin  1078-46.1-ci bəndi.)

   

• Dövlət özəlləşdirmə payı nədir və tədavül müddəti hansı tarixə gədər müəyyən edilib ?
  
  

  Dövlət özəlləşdirmə payı (çek) dövlət mülkiyyətinin bir hissəsinin əvəzsiz olaraq verilməsini təmin edən qiymətli kağızdır. 1 (bir) dövlət özəlləşdirmə payı 4 (dörd) çekdən ibarətdir. Dövlət özəlləşdirmə paylarının (çeklərinin) tədavül müddəti 2010-cu il 1 yanvar tarixinədək uzadılmışdır.

  (Əsas:  Azərbaycan Respublikası Prezidentinin 1996-cı il 25 mart tarixli 450 nömrəli “Azərbaycan Respublikasında dövlət özəlləşdirmə paylarının (çeklərinin) dövriyyəyə buraxılması haqqında” Fərmanı ilə dövriyyəyə buraxılıb. Azərbaycan Respublikasında dövriyyəyə buraxılmış dövlət özəlləşdirmə paylarından (çeklərindən) özəlləşdirmə prosesində daha geniş şəkildə istifadənin təmin olunması sahəsində əlavə tədbirlər haqqında” Azərbaycan Respublikası Prezidentinin 2007-ci il 13 noyabr tarixli 649 nömrəli Fərmanı.)

   

• Qiymətli kağızların tədavülü nədir?
  
  

  Qiymətli kağızların tədavülü yerləşdirmədən sonra qiymətli kağızlarla mülki-hüquqi əqdlərin bağlanması nəticəsində mülkiyyət hüquqlarının keçməsi və qeydiyyatı prosesidir. (Əsas:  Mülki Məcəllə 1078-20.1.-ci bəndi.)

   

• Stimullaşdırıcı lotereyanın keçirilməsi barədə məlumatı hansı qaydada Azərbaycan Respublikasının Qiymətli Kağızlar üzrə Dövlət Komitəsinə bildirmək lazımdır?
  
  

  Lotereyanın təşkilatçısı lotereyanın başlanmasına azı 20 (iyirmi) iş günü qalmış Azərbaycan Respublikasının Qiymətli Kağızlar üzrə Dövlət Komitəsinə aşağıdakıları təqdim etməlidir:

  • lotereyanın keçirilməsi barədə bildirişi (bildirişdə  lotereya təşkilatçısının adı  və olduğu yer, lotereyanın adı  və keçirilmə forması  göstərilməlidir);
  • lotereyanın  şərtlərini;
  • lotereyada istifadəsi nəzərdə tutulduğu halda, lotereya biletinin nümunəsini;
  • lotereya təşkilatçısının dövlət qeydiyyatı  haqqında şəhadətnamənin notarial qaydada təsdiq edilmiş  surətini;
  • lotereya təşkilatçısının vergi orqanları  tərəfindən uçota alınması haqqında sənədin surətini;
  • lotereya digər şəxsin tapşırığı  ilə keçirildiyi halda, bu barədə  tapşırıq müqaviləsinin lotereyanın keçirilməsinə  vəkalət verən şəxs tərəfindən təsdiq edilmiş  surətini.

   

• Stimullaşdırıcı lotereya nədir?
  
  

  Stimullaşdırıcı lotereya - malın (işin, xidmətin) satışını stimullaşdırmaq məqsədilə həmin malı (işi, xidməti) almış şəxslər arasında keçirilən lotereya formasıdır.

   

• Lotereya nədir?
  
  

  Lotereya - lotereya təşkilatçısı tərəfindən lotereya biletlərinin (onlara bərabər tutulan digər məlumat daşıyıcılarının) yayılması, lotereya iştirakçıları arasında uduş fondunun oynanılması və uduşlu lotereya biletlərinin (onlara bərabər tutulan digər məlumat daşıyıcılarının) sahiblərinə uduşların verilməsi (ödənilməsi) yolu ilə keçirilən kütləvi oyundur.

  Tirajlı  lotereya - uduş fondu əvvəlcədən təyin edilmiş vaxtda oynanılan lotereyanın keçirilməsi formasıdır.

  Ani lotereya - uduşu lotereyanın iştirakçısı tərəfindən lotereyada iştirak hüququnu təsbit edən lotereya bileti əldə etdikdən dərhal sonra digər lotereya iştirakçılarından asılı olmadan müəyyən olunan lotereyanın keçirilməsi formasıdır.

  Məqsədli lotereya - müvafiq icra hakimiyyəti orqanının qərarı ilə dövlət əhəmiyyətli layihənin maliyyələşdirilməsi məqsədi ilə keçirilən lotereya formasıdır.

   

• Qiymətli kağızlar bazarında peşəkar fəaliyyət üzrə xüsusi razılıq (lisenziya) verilməsi üçün hansı sənədlər tələb olunur?
  
  

  1. Lisenziya almaq üçün ərizə;

  Ərizədə aşağıdakılar öz əksini tapmalıdır:

  Hüquqi şəxslər üçün - adı, təşkilati-hüquqi forması, hüquqi ünvanı, hesablaşma hesabının nömrəsi və bankın adı, fəaliyyət növü;
  Fiziki şəxslər üçün - adı, atasının adı, soyadı, şəxsiyyət vəsiqəsinə dair məlumatlar (seriya, nömrə, nə vaxt və kim tərəfindən verilmişdir, ünvanı), fəaliyyət növü;

  2. Hüquqi şəxsin dövlət qeydiyyatı haqqında şəhadətnaməsinin surəti;

  3. Ərizəçinin vergi orqanları tərəfindən uçota alınması haqqında müvafiq sənədin surəti;

  4. Ərizədə qeyd olunan obyektlərdən hər biri üçün ərizəçinin istifadə hüququnu (mülkiyyət hüququ, icarə, istifadə və s. əsasları) təsdiq edən sənədin surəti;

  5. Lisenziya almaq üçün dövlət rüsumunun ödənildiyini təsdiq edən sənədin surəti (QKDK tərəfindən lisenziyanın verilməsi haqqında qərar qəbul edildikdən sonra);

  ƏSAS: Azərbaycan Respublikası Prezidentinin 2002-ci il 2 sentyabr tarixli Fərmanı ilə təsdiq edilmiş “Azərbaycan Respublikasında bəzi fəaliyyət növlərinə xüsusi razılıq (lisenziya) verilməsi haqqında Qaydalar”.

   

  ƏLAVƏ  ŞƏRTLƏR:

  Broker fəaliyyəti üçün:

  1. Sonuncu hesabat tarixi üçün tərtib olunmuş mühasibat balansı və maliyyə-təsərrüfat fəaliyyəti haqqında hesabat;
  2. Hüquqi şəxslər üçün - Ərizəçinin ştatında olan 3 (üç) əməkdaşın QKDK tərəfindən   müvafiq peşə fəaliyyətinin həyata keçirilməsi üçün verilmiş ixtisas şəhadətnamələrinin surətləri;
  3. Mövcud qanunvericiliyə uyğun olaraq QKDK tərəfindən müəyyən olunmuş qaydada peşə fəaliyyətinin həyata keçirilməsi üçün müvafiq şəraitə malik olan yerin, proqram təminatının, texniki vasitələrin və diğər müvafiq avadanlıqların olması barədə arayış.

   

  Diler fəaliyyəti üçün:

  1. Sonuncu hesabat tarixi üçün tərtib olunmuş mühasibat balansı və maliyyə-təsərrüfat fəaliyyəti haqqında hesabat;
  2. Hüquqi şəxslər üçün - Ərizəçinin ştatında olan 3 (üç) əməkdaşın QKDK tərəfindən   müvafiq peşə fəaliyyətinin həyata keçirilməsi üçün verilmiş ixtisas şəhadətnamələrinin surətləri;
  3. Mövcud qanunvericiliyə uyğun olaraq QKDK tərəfindən müəyyən olunmuş qaydada peşə fəaliyyətinin həyata keçirilməsi üçün müvafiq şəraitə malik olan yerin, proqram təminatının, texniki vasitələrin və diğər müvafiq avadanlıqların olması barədə arayış.

   

  Qiymətli kağızların idarə olunması üzrə fəaliyyət üçün:

  1. Sonuncu hesabat tarixi üçün tərtib olunmuş mühasibat balansı və maliyyə-təsərrüfat fəaliyyəti haqqında hesabat;
  2. Hüquqi şəxslər üçün - Ərizəçinin ştatında olan 3 (üç) əməkdaşın QKDK tərəfindən müvafiq peşə fəaliyyətinin həyata keçirilməsi üçün verilmiş ixtisas şəhadətnamələrinin surətləri;
  3. Fiziki şəxslər üçün - fiziki şəxsin QKDK tərəfindən müvafiq peşə fəaliyyətinin həyata keçirilməsi üçün verilmiş ixtisas şəhadətnaməsinin surəti;
  4. Mövcud qanunvericiliyə uyğun olaraq QKDK tərəfindən müəyyən olunmuş qaydada peşə fəaliyyətinin həyata keçirilməsi üçün müvafiq şəraitə malik olan yerin, proqram təminatının, texniki vasitələrin və diğər müvafiq avadanlıqların olması barədə arayış.

   

  Depozitar fəaliyyəti üçün:

  1. Sonuncu hesabat tarixi üçün tərtib olunmuş mühasibat balansı və maliyyə-təsərrüfat fəaliyyəti haqqında hesabat;
  2. Ərizəçinin ştatında olan 3 (üç) əməkdaşın QKDK tərəfindən depozitar fəaliyyətinin həyata keçirilməsi üçün verilmiş  ixtisas şəhadətnamələrinin surətləri;
  3. QKDK tərəfindən təsdiq edilmiş "Depozitar fəaliyyətinin həyata keçirilməsi standartları"nın tələblərinə uyğun hazırlanmış müvafiq standartların surəti;
  4. Mövcud qanunvericiliyə uyğun olaraq QKDK tərəfindən müəyyən olunmuş qaydada depozitar fəaliyyətini lazımi səviyyədə təmin edən yer, proqram təminatı, texniki vasitələrin və digər müvafiq avadanlıqların olması barədə arayış.

  
  Qiymətli kağız sahiblərinin reyestrinin aparılması  üzrə fəaliyyət üçün:

  1. Sonuncu hesabat tarixi üçün tərtib olunmuş mühasibat balansı və maliyyə-təsərrüfat fəaliyyəti haqqında hesabat;
  2. Ərizəçinin ştatında olan 3 (üç) əməkdaşın qiymətli kağız sahiblərinin reyestrinin aparılması fəaliyyəti üçün QKDK tərəfindən verilmiş ixtisas şəhadətnamələrinin surətləri;
  3. QKDK tərəfindən təsdiq edilmiş "Qiymətli kağız sahiblərinin reyestrinin aparılması standartları"nın tələblərinə uyğun hazırlanmış müvafiq standartların surəti;
  4. Mövcud qanunvericiliyə uyğun olaraq QKDK tərəfindən müəyyən olunmuş qaydada qiymətli kağız sahiblərinin reyestrinin aparılması üzrə fəaliyyəti lazımi səviyyədə təmin edən yer, proqram təminatı, texniki vasitələrin və digər müvafiq avadanlıqların olması barədə arayış

  Qarşılıqlı  öhdəliklərin müəyyən edilməsi üzrə fəaliyyət (klirinq) üçün:

  1. Sonuncu hesabat tarixi üçün tərtib olunmuş mühasibat balansı və maliyyə-təsərrüfat fəaliyyəti haqqında hesabat;
  2. Ərizəçinin ştatında olan 3 (üç) əməkdaşın QKDK tərəfindən qarşılıqlı öhdəliklərin müəyyən edilməsi üzrə  fəaliyyətinin (klirinqin) həyata keçirilməsi üçün verilmiş  ixtisas şəhadətnamələrinin surətləri:
  3. QKDK tərəfindən təsdiq edilmiş "Qarşılıqlı öhdəliklərin müəyyən edilmiş üzrə fəaliyyətin (klirinqin) həyata keçirilməsi qaydaları"nın tələblərinə uyğun hazırlanmış müvafiq qaydaların surəti;
  4. Mövcud qanunvericiliyə uyğun olaraq QKDK tərəfindən müəyyən olunmuş qaydada klirinq fəaliyyətini lazımi səviyyədə təmin edən yer, proqram təminatı, texniki vasitələrin və digər müvafiq avadanlıqların olması barədə arayış.

  Fond birjası fəaliyyəti üçün:

  1. Sonuncu hesabat tarixi üçün tərtib olunmuş mühasibat balansı və maliyyə-təsərrüfat fəaliyyəti haqqında hesabatın surəti;
  2. Ərizəçinin ştatında olan 3 (üç) əməkdaşa Azərbaycan Respublikasının Qiymətli Kağızlar üzrə Dövlət Komitəsi (bundan sonra - QKDK) tərəfindən fond birjası fəaliyyətinin həyata keçirilməsi üçün verilmiş ixtisas şəhadətnamələrinin surətləri;
  3. QKDK tərəfindən təsdiq edilmiş standartlara uyğun olaraq hazırlanmış:

  - qiymətli kağızlarla ticarətin qaydalarının surəti;

  - qiymətli kağızların ticarətə buraxılması (listinq) və ticarətdən çıxarılması (delistinq) qaydalarının surəti;

  - birjada bağlanmış əqdlər üzrə hesablaşmaların və uçotun həyata keçirilməsi qaydalarının surəti.

  1. Mövcud qanunvericiliyə uyğun olaraq QKDK tərəfindən müəyyən olunmuş qaydada birja fəaliyyətini lazımi səviyyədə təmin edən yer, proqram təminatı, texniki vasitələr və digər müvafiq avadanlıqların olması barədə arayış.

  ƏSAS: Azərbaycan Respublikası Nazirlər Kabinetinin 2002-ci il 7 noyabr tarixli 174 nömrəli Qərarı ilə təsdiq edilmiş "Fəaliyyət növlərinin xüsusiyyətindən asılı olaraq xüsusi razılıq (lisenziya) verilməsi üçün tələb olunan əlavə Şərtlər". 

   

   

• İxtisas şəhadətnaməsinin alınması üçün hansı sənədlər tələb olunur?
  
  

  İxtisas şəhadətnaməsinin alınması üçün Azərbaycan Respublikasının Qiymətli Kağızlar üzrə Dövlət Komitəsinə aşağıdakı sənədlər təqdim olunmalıdır:

  • anket-ərizə;
  • şəxsiyyəti təsdiq edən sənədin surəti;
  • fotoşəkil (3x4).